Oliy majlis tomonidan birinchi o‘qishda qabul qilingan yangi qonun loyihasi xorijga ishlash uchun yo‘l olgan fuqarolarga yanada shaffof va xavfsiz migratsiyani va’da qilmoqda.

Qonundan ko‘zlangan maqsad: fuqarolar huquqlari himoyasini kuchaytirish, xususiy agentliklar mas’uliyatini oshirish, migratsiya sohasida hukumat va biznes hamkorligini rivojlantirish. 

O‘zgarishlar mohiyati

— Migratsiya agentligi tartibga soluvchi yagona organga aylanadi: u litsenziyalar taqdim etadi, nazorat qiladi va jarimaga tortadi.

— Xususiy agentliklar uchun reyting tizimi va axloq kodeksi joriy etilmoqda. Firibgarlik, odam savdosi yoki terrorchilik uchun sudlangan shaxslar ishlaydigan agentliklarga faoliyat olib borish taqiqlanadi.

— Agentliklar til va kasb-hunar o‘rgatish kurslarini tashkil etadi.

— Shartnomalarning ishonchliligi sug‘urta va depozitlar hisobiga ta’minlanadi.

— Ish bilan ta’minlash xizmatlari haqini mustaqil to‘lash imkoniyati yaratiladi.

— Litsenziya olish qonun-qoidalari soddalashtiriladi: garov miqdori kamaytiriladi, shaffoflik darajasi oshiriladi.

— Mehnat shartnomalari raqamli platformada ro‘yxatdan o‘tkaziladi.

Qonun loyihasi Singapur, Hindiston, Filippin va Vyetnam tajribasidan ilhomlangan holda ishlab chiqilgan bo‘lib, ushbu mamlakatlarda mehnat migratsiyasi qat’iy tartibga solingan va ish izlovchilar uchun xavf darajasi ancha past.