O‘zbekistonda yozgi mavsumda – maydan avgustgacha avtomobil oynalarini qoraytirish (tonirovka) bo‘yicha ruxsatnoma narxini pasaytirish taklif qilindi.

IIV tegishli qonun loyihasini jamoatchilik muhokamasi uchun joylashtirdi.

Bu nega muhim:

Hozirda mamlakatda oynalarni qoraytirishga ruxsatnoma juda qimmat bo‘lib, faqat bir yil muddatga beriladi. Yangi tashabbus undan arzonroq narxda va uzoqroq muddat foydalanish imkoniyatini yaratadi.

Tafsilotlar:

Hukumat qarorining loyihasida quyidagilar taklif qilinmoqda:

Yengil avtomobillar (M1 toifa) oynalarini qoraytirish bo‘yicha mavsumiy (may-avgust) ruxsatnomalarni joriy qilish;

Bunday ruxsatnomalar narxini pasaytirish:

— O‘zbekiston fuqarolari va yuridik shaxslari uchun — 1 BHM (412 ming so‘m);

— Chet el kompaniyalari uchun — 5 BHM (2,06 mln so‘m).

Yillik tonirovkaning amaldagi narxi:

8 BHM (3,296 mln so‘m) — O‘zbekiston fuqarolari va yuridik shaxslari uchun;

14 BHM (5,768 mln so‘m) — chet el kompaniyalari uchun.