O‘zbekiston va Qozog‘iston chegarasida yuzlab avtomobillar to‘planib qolgan. Odamlar ichimlik suvi va hojatxonasiz sharoitda chegaradan o‘tishni soatlab kutmoqda, deb yozdi “Gazeta.uz”

Guvohlar nima deydi?

8 soat ichida chegaradan atigi 9 ta mashina o‘tib olgan. Odamlar “5 mingdan 15 ming rubl”gacha bo‘lgan miqdordagi pul bilan bog‘liq tovlamachilik holatlari haqida xabar bergan. Ayrim oilalar chegarada yosh bolalari va pulsiz qolib ketgan.

“Shu vaqtgacha O‘zbekiston tomonida hech qanday muammo bo‘lmagan, bu holat Qozog‘iston chegarachilarining xatti-harakatlari sabab yuzaga kelmoqda”, – deydi guvohlardan biri Igor Aipkin.

Bojxona xizmatlari pozitsiyasi

O‘zbekiston: Hech qanday to‘siq yo‘q, mashinalar kelishi bilan o‘tkazib yuborilmoqda.

Qozog‘iston: Hali rasmiy munosabat bildirilganicha yo‘q.

30-may kuni ikki mamlakat vakillarining ishchi uchrashuvi bo‘lib o‘tgan. Tomonlar asosiy postlarga tushayotgan bosimni kamaytirish uchun yuklar oqimini qayta yo‘naltirishga kelishib olishgan.

Postlar qanday ishlayapti?

Yengil avtomobil va piyodalar: “Navoiy”, “Yallama”

Soat 08:00 dan 18:00 gacha: “Oq oltin”, “Malik”

Yuk mashinalari: “Yallama”, “S. Najimov”, “Sirdaryo”, “Dovud ota”

“G‘ishtko‘prik” va “Jibek joli” rekonstruksiya uchun yopilgan.

Batafsil

Qozog‘iston avvalroq “Qoplonbek” nazorat-o‘tkazish punkti modernizatsiya qilingani haqida xabar bergandi. Ammo guvohlar punktdan o‘tish tezligining pastligi, tirbandliklar va tartibsiz ish jarayonidan shikoyat qilishgan.

Pul berib, navbatsiz o‘tib olishga doir shikoyatlar har ikki mamlakat chegarachilariga bo‘lgan ishonchni pasaytirmoqda.

Endi nima bo‘ladi?

O‘zbekiston postlarda ishlash tezligi oshirilganini ma’lum qilgan. Ammo navbatlar kamaymayapti. Fuqarolar Qozog‘iston tomondan amaliy harakat bo‘lishini kutmoqdalar.