Sankt-Peterburgda muhojirlarning taksi va yetkazib berish xizmatlarida ishlashiga nisbatan taqiq joriy etilishi mumkin. Shahar gubernatori qarori loyihasi “Korrupsiyaga qarshi ekspertiza” bo‘limida e’lon qilindi.

Unga ko‘ra, quyidagi faoliyat turlari taqiqlanadi:

  • Taksi va haydovchi bilan avtomobil ijarasi
  • Kuryer sifatida ishlash, jumladan oziq-ovqat yetkazib berish
  • Transportdan foydalangan holda har qanday turdagi yetkazib berish xizmati

Tafsilotlar

Bu YeII (Qozog‘iston, Qirg‘iziston, Armaniston, Belorus) fuqarolariga taalluqli emas.

Ko‘rsatmalarni bajarish uchun hujjat kuchga kirgan kundan boshlab 3 oy vaqt ajratiladi. Mehnat va bandlik qo‘mitasi 2026-yilda aynan shunday taqiq qo‘yish bo‘yicha taklif kiritishi shart.

Bu kabi taqiqlar Rossiyaning boshqa hududlarida ham joriy etilgan.

Markaziy Rossiya

Kaluga, Tambov, Lipesk, Tula, Voronej: taksi, transport, umumiy ovqatlanish, savdo-sotiq, ta’lim va madaniyat sohalarida ishlash taqiqlangan.

Tver, Smolensk, Kostroma: ijtimoiy sohalarda taqiqlar mavjud.

Volga bo‘yi

Nijniy Novgorod: kuryer, shifokor, umumiy ovqatlanish sohasi xodimi sifatida ishlash mumkin emas.

Perm, Orenburg: transport, neft, dorixona, kiosklar, qurilish sohasida ishlash taqiqlangan.

Udmurtiya: sabzavotchilik, yo‘lovchi tashish, taksi haydovchisi sifatida faoliyat yuritish taqiqlangan.

Ural

Chelyabinsk: mehmonxonalar, umumiy ovqatlanish, ta’mirlash, ko‘ngilochar tadbirlar yo‘nalishlari bo‘yicha taqiqlar mavjud.

Qo‘rg‘on: ta’lim, ovqatlanish, transport.

Tyumen, Yugra, YANAO: transport, alkogol va tamaki savdosi, umumiy ovqatlanish yo‘nalishlarida ishlash taqiqlangan.

Sibir

Kemerovo (Kuzbass): taqiqlangan sohalar – mehmonxonalar, taksi, tibbiyot, kosmetologiya, ta’lim.

Krasnoyarsk: taksi, alkogol va tamaki savdosi.

Janub

Krasnodar o‘lkasi: 85 turdagi faoliyat bo‘yicha (qishloq xo‘jaligidan tortib mehmonxona yo‘nalishigacha) cheklovlar mavjud.

Qrim: 35 turdagi faoliyat, jumladan IT, ta’lim, oziq-ovqat, media yo‘nalishlarida ishlash taqiqlangan.

Volgograd: taqiqlangan sohalar (2025) — tibbiyot, savdo-sotiq, transport, yetkazib berish, ovchilik.

Uzoq Sharq

Magadan: 2024-yildan boshlab taksi va jamoat transportlarini boshqarish taqiqlangan.