Nimalar sodir bo‘ldi?

Rossiya Tergov qo‘mitasi 2024-yilning mart oyida 149 kishi qurbon bo‘lgan “Krokus Siti Xoll”dagi terakt bo‘yicha jinoiy ish tergovini yakunladi. Qo‘mita vakili Svetlana Petrenkoning aytishicha, jinoyat go‘yoki “Ukrainaning amaldagi rahbariyati manfaatlarini ko‘zlab” rejalashtirilgan va undan Rossiyadagi vaziyatni beqarorlashtirish maqsadi ko‘zlangan.

Ayblanuvchilar

Jinoiy javobgarlikka 19 nafar fuqaro – “Viloyati Huroson” terrorchilik guruhi a’zolari va ularning sheriklari tortilgan. Tergov natijalariga ko‘ra, ularning 4 nafari bevosita hujumda ishtirok etgan. Yana 6 nafari qurol-yarog‘, uy va yo‘llarni tayyorlash bilan shug‘ullangan.

Batafsil

Rossiya hukumati yirik teraktlarni birinchi marta “Ukraina izi” bilan bog‘lashga harakat qilmayapti. Qizig‘i shundaki, terakt sodir etilganidan keyin oradan hech qancha vaqt o‘tmay uning uchun javobgarlikni “Islom davlati” o‘z zimmasiga olgan. Rossiya rasmiylari teraktda Ukrainaning ishtirokiga oid dalillarni oshkor qilmagan.

Muhojirlarga qarshilik kayfiyatining avj olishi

“Krokus”dagi fojiadan keyin Rossiyada Markaziy Osiyo mamlakatlaridan kelgan muhojirlarga qarshi ta’qib boshlangan: ommaviy tekshiruvlar, hibsga olish va deportatsiyalar kuzatilmoqda, rasmiy bayonotlar va OAVda muhojirlarni ajratish ohangi kuchaygan.

Endi nima bo‘ladi?

Ish sudga oshirish uchun prokurorga yuborilgan. Bir nechta ayblanuvchilar ishi bo‘yicha tergov davom etmoqda.